Os primeiros eventos do ano na Libraría NUMAX

Neste recuncho do noso espazo, a escritora Berta Dávila leunos o primeiro capítulo da novela A ferida imaxinaria editada por Xerais; o escritor e filósofo Santiago Alba Rico presentou o libro de artigos De la moral terrestre entre las nubes (Pepitas Editorial) xunto a Germán Labrador; tamén coñecemos máis sobre a novela gráfica Sentinelas da lúa carmesí xunto a Andrés Castro, Ozo Perozo e Alexandre Senande e sobre o cómic El Cuerpo de Cristo de Bea Lema, no mesmo mes no que recibía o premio do público no Festival de Cómic de Angouléme. A finais de xaneiro, o xornalista Ramón Mariño afondou na historia da autoedición en Galicia, mentres en febreiro foi tempo de escoitar os poemas de A cousa eterna na voz de Celso Fernández Sanmartín e os versos de Sonora na voz de Chus Pato. Tamén de coñecer o proceso de creación detrás do álbum Bosque Animado do fotógrafo Vari Caramés editado en Fabulatorio. E o que queda por vir amiguxs! 🫣💙